الاثنين، 16 مايو، 2011

لحظات فاصله

فصل الصيف

الثاني من مايو

الساعة الثانية ظهراا

الشمس تتوسط السماء , حرارتها تقلب الأرض جحيما

الهواء كأنما يحمل نارا ,

يتصاعد البخار من الترعة ,

يكاد الاسفلت يتشقق من شدة الحر ,

يصل القرية بالمدينة طريق سريع ,

على منتهى القرية وبداية الطريق عريشة ,

وعلى الضفه الاخرى شجرة عملاقة , تحتها يسكن كلب اسود صندوق القمامه الأخضر .

العريشه هي مؤوى صديق وصديقه في مثل هذه اليام الملتهبه ,

يحتمي الطفلان بظل العريشة من لهيب الشمس يأكلون المقرمشات ,ويشربون عصير القصب .

يوميا

نفس الظل ,

نفس الشمس ,

نفس الكلب الاسود ,

نفس الصندوق الاخضر ,

و نفس العربات الماره ,

في نفس المواعيد .

يزداد ارتفاع الشمس في السماء وتزداد درجه حرارة الجو

ينهي الصديقان كيسي المقرمشات وعصير القصب

يعبر الصديق الشارع ليرمي كيس المقرمشات في صندوق القمامة الاخضر

صديقه يأبى ويرمي الكيس على الطريق .

عربة ااتيه من لا بعيد ولا قريب

يعبر الصديق الطريق مسرعا

تهب نسمه شيطانيه

يرتفع الكيس من على الطريق

يهبط الكيس على الكلب الاسود

يذعر الكلب ويعبر الطريق

يصل الصديق الى الصندوق الاخضر

صوت نباح ,

صوت فرمله ,

صوت اصطدام ,

صوت تحطم العريشة ,

صمت الموت .

عصر ذلك اليوم شيعت القريه جنازة طفل .

تمت

الخميس، 12 مايو، 2011

متلازمة ما قبل الامتحان

متلازمة ما قبل الانتحان

by Ahmad Abdelrazek on Thursday, May 12, 2011 at 12:58am

قوم دلوقتي بص في المرايه .

يخرب بيت ام كسلك ,يا سيدي اطفي الشاشه وبص في انعكاسك , ما هو انت لو قاعد على كتاب كنت ما صدقت , ولو امك سالتك " بتعمل ايه , يا اهبل ؟ " هتقولها " بعمل تجربه علميه يا وليه " .

عايزك تلاحظ شكلك دلوقتي كويس , عايزك تلاحظه عشان تفتكر انك في يوم من الايام كنت بني اادم , عايزك تفتكره وحبذا لو تصوره عشان بعد شهر من دلوقتي , ولما تقوم تبص في المرايا ,وتفوجئ بكائن ااخر ,تقول والله زمان وايام زمان , ولما زميلك في اي كليه تانيه يسالك " انت مين ؟؟ " دا لو التحول تم بالكامل ,او يقولك " ايه اللي عمل فيك كدا يا بني ؟؟ " دا لو التحول لسه متمش بالكامل ودا غالبا بيبقى اسبوع قبل الامتحان ,عايزك تلاحظ شكلك كويس عشان لما تحلف بالله انك بني اادم تكون من جواك مصدق اللي بتقوله ,لان انت الوحيد بس اللي هيكون مصدق .

بتبدأ الظاهره شهرقبل الامتحانات , لما تبدا تدرك ان في 8 شهور من السنه الدراسيه عدوا ,وان باقيلك بس شهر على الامتحان , الامتحان اللي هيقيم مجهودك طول السنه ,الامتحان اللي هيحدد حاجات كتير ,الامتحان اللي هيحدد حاجات رخيصه جداا زي هناخد اجازه السنه دي ولا لا ؟؟؟ ,الامتحان اللي ممكن يحد حاجات غاليه جدااا زي هل دادي هيجيبلي طياره ولا هيغيرلي العربيه بس ؟؟؟ ,الامتحان اللي هيحدد هتصيف يومين في بلطيم ولا اسبوع في مارينا .

سواء كنت مذاكر او مش مذاكر ,بتدخل في المرحله الاولى من " بري ايكزام سيندروم "وهي الادراك ,ما هو انت لازم تعرف ان عندك امتحان عشان تدخل في متلازمة ما قبل الامتحان ,انما لو مثلا عملت زي واحد صاحبي اتصلوا بيه وبيقولوله

- " انت مجتش الامتحان ليه يا معلم ؟؟

- " وهو يرد " امتحان ايه ؟؟ "

- "امتحان امبارح يا معلم ,انت متعرفش ولا ايه ؟؟ "

- لا والله ما حد قلي "

دي مش متلازمة ما قبل الامتحان دي متلازمة ( صوتي يا ام احمد ) , بعد ان تدرك عدد الايام مقارنه بالكتب والمراجع والمزكرات اللي مطلوب منك انك تخلصها ,بتحس ان نبضات قلبك بتزداد ,وان عرق بارد بيتسرب من جبهتك ,و ان اطرافك بتتجمد , وحكه لا اراديه في المؤخره اليمنى .....من الرأس يا صايع ,وللحظات بتحس انك مش عارف تاخد نفسك ,مش عارف تفكر ,مش عارف تعمل ايه ؟؟ , ودا ما يسمى في علم النفس بالذعر .

بعد دقائق معدوده من الذعر بتبدأ تفوق , ويبدأ عقلك يستعيد وظائفه ,بتبدأ تهدى وتفكر , وبتعرف انك عديت مرحلة الذعر دي لما تلاقي نفسك بتقول كلمة معينه لا اراديا ,كلمه بتقولها من اول ما عرفت يعني ايه مدارس ,من اول ما ادركت وانت صغير وبرئ انك كل ااخر سنه هيتعمل فيك حاجات وحشه خالص , والكلمه دي بتختلف باختلاف الازواق والمقاسات , عند البنات اعتقد بتكون من عينة " يا لهوي " وعند الولاد من عينة " تيييييييييييييييت " .

بعد ما تفرغ شحنتك السلبيه ,بتبدأ بقى تطمن نفسك , وتقول كلام من عينة " انا قدها " ,"يا عم بسيطه ,انا دماغي نضيفه وهاعرف اخلص " , "تييييييييييييت ملعون ابو دي كلية اللي بتعكر مزاج الواحد " ," مامااااااااا .... عايز ااكل " ,كل دي كلمات غرضها انك تطمن نفسك وتستعيد رابطة جحشك ,والغريبه انك بتصدقها ,وبتصدق انك هتجيب امتياز ,والتصديق دا بيتساوى فيه اللي بيطحن طول السنه واللي بيستعبط طول السنه .

واول حاجه بتعملها بعد ما تخلص ذعر يا ولدااااه انك تعمل جدول , تقوم تجيب المسطره ,واقلام الوان ,والقلم الرصاص ,واستيكه ,وورقه بيضه حلو يا بيضه ؟؟ ,وتقعد تعمل مربعات ومستطيلات ومثلثات حتى , وبيعتريك نشاط فظيع جدا وانت بتعمل الجدول ,وبتضن بالله الظنون وتفكر انك هتذاكر بنفس الشاط دا يا عيني عليك ,المهم يا سيدي وتعمل لكل خانه الوان ,وتراعي الايام , وتراعي كمان اوقات الراحه ,وتقول لازم اجدد نشاطي ,ولازم متقلش على نفسي عشان مخسعش في الاخر , ومش عايز ازهق نفسي ,وكل التضحيات دي عشان اذاكر كويس ,مبدأ خمسه لعقلك وعشره لقلبك .

وبعد مجهود عظيم جبار ااخدله 3 ساعات , تبص على مشروعك الرائع ,وتنتشي وتحس بنفخه كذابه ,وتقول لنفسك "ايه ياد الحلاوة دي ياد ؟؟ ,شكلك كدا وبالصلاة على النبي هتجيب الانتياز السنه دي " ,وتنقل عينك بين الخانات ,وبين الالوان ,وبين المربعات ,لحد ما تقع عينك على مربع الراحه تقوم تقول لنفسك " وكمان مراعي مزاجك يا ابن اللئيمه ؟؟ " ,وتبدا تفكر انك هتخلص المنهج ,لا وهتاخد راحتك كمان , وتراجع ,وتدخل تجيب امتياز , واحد عامل جدول ولاقي وقت يتفرج على الحب الممنوع مش هيعرف يقفل كوميونتي مثلا ؟ .

الغريبه بقى انك اول ما تثبت عينك على مربع الراحه او مستطيلها او حتى مثلثها , تحس ان نار عزيمتك انطفت ,او انك بدات تكسل ,بس انت بقى بتتحرج تعترف بدا ,تقوم تقول لنفسك " بص ياد يا ابو عبرازق انت تاخد بكره ااجازه ,وتبدا من بعد بكره ,عشان كدا تخلص كل المرح وميبقاش نفسك في حاجه تشغلك عن الانتحان " قال يعني بروح امي ماخدتش كفايتي طول ال 8 شهور وجايه على اليوم دا اللي هيفر معايا ,وسبحان الله طول عمره بيبقى يوم اربع ,تقوم تقول لنفسك " هو حد بيذاكر الجمعه برضوا ؟؟ ,نبدا السبت اول الاسبوع دا اشطه ؟ " ,وتبرر فعلتك الشنيعه "يا عم والايام الضايعه دي هنعوضها من الراحه وهاجي على نفسي " .

المهم انك هتبدأ الاتنين , بس للامانه بتبدأ كلك حماس وحيويه ونشاط ,وتدخل يا قاتل يا مقتول ,وتحلف بالطلاق انك لازم تخلص حاجة اليوم ,تصحى بدري ,تجمع كل الكتب كل المذكرات , تجيب كاشكول بسلك عشان تكتب وانت بتذاكر ,تجيب اقلام الوان عشان تروق نفسك وكدا ,وتسمي الله وتبدأ , اول ما تبدا بتقعد تلخص اللي بتقراه وتعمل بالالوان ,وتسطر وتعمل اسهم وحركات ,يمر الوقت سريعا وانت حضرتك قاعد تهبب على دماغك ودماغ اللي خلفوك ,وعاملي رسام ,وقاعد مضيع وقتك في " هو انا بعمل السهم بالاخضر ولا الاحمر ؟؟ ,هو راس الموضوع بكتبه لمين ولا شمال ؟؟ " وترجع للصفحه اللي قبلها عشان عايز تنظم وتظبط ,وتفوجئ انك من الساعه 6 الصبح ومخلصتش غير 5 صفح ,بس للامانه انت مخلصهم بالالوان .

تنتابك موجة ادراك اخرى , " الهباب اللي انا بهببه دا مش هينفع , انا معدتش هاستعمل اللون الاخضر بيضيع وقت صراحه " ,مع الوقت هتلاحظ ان خطك بدا يسوء ,وان كلامك معدش واضح ,شويه شويه تلاقي انك بقيت بتكتب اول حرفين من الكلمه , اختصاراتك زادت ,والوانك قلت , وتحس بالذنب انك بتكروت , وهنا تقرر انك تكتب بزمه بس بالازرق بس .

واحده واحده تبطل تكتب كل حاجه ,وتقول لنفسك "هو انا هاكتب الكتاب تاني بروح امي م هو موجود اهه " , وتكتب بس الحاجات المهمه اللي انت عايز تفتكرها كويس , زي اسماء الادويه , او الحاجات المميزه في الامراض , او انواع الصبغات وكدا ,وبكدا تكون خسرت كشكول زياده كتبتلك فيه صفحتين , ورميته .

الغريبه يا جدع انك تبقى ملتزم باوقات الراحه جدااااااا ,ومتفوتش منها حاجه ,لحد ما تحس انك اتزنقت بجد , تبدا هنا بقى تخلص الموضوع وتسيب ااخر 5 صفحات فيه , وتقول " انا اخلص بس الحاجات المهمه , وفي الاخر الرفايع دي هلمها في يوم لوحدها " ,وابقى قابلني لو بصيت في خلقتها بعد كدا ,واحده واحده تلاقي نفسك بعد ما كنت بتسقط صفح بقيت بتسقط مواضيع بحالها .

وياجي اسبوعين قبل الامتحان , مخلصتش حاجه ,الوقت قل للنص , ضيعت كشكول ,واشتريت قلم بينك على الفاضي ,وتسال نفسك السؤال المهم " هادخل من غير ايه السنه دي ؟؟ ",وتحاول تبرر لنفسك فعلتك الشنيعه بأي طريقه , وانك حاولت , وان لو كان على هبدالله صالح اتنحى مكنتش انا اتزنقت , وتتسااءل هو ليه الواحد لازم يروح الحمام يعني ,وتلوم نفسك على اللبن المسكوب .

وطبعا قرار المواضيع اللي هتتساب دي مش قرار سهل , انت بتتصل بصحابك , وتقعد تعمل استفتاء عن ايه الحاجات اللي درجاتها اقل , ايه الحاجات اللي متوقع متجيش في الامتحان ,تسيب فرع كامل زي “سيستمك باكتريا ” وتشيل ميكرو ؟؟ ,ولا تسيب موضوعات صغننه في كل فصل وحظك الاسود لان نيتك اسود ان الامتحان ياجي من المواضيع الصغننه دي وتقعد انت في الامتحان تضحك تضحك وتشيل بايو ( قصص حقيقيه من حياة الكاتب ) .

تقرر تسيب الحاجات الاقل اهميه من وجهه نظرك انت والامامير صحابك , وتبدا تذاكر لاول مره بطريقه جد وعمليه ,على ظهرك ,ااه على ظهرك ,تمدد على الكنبه ,وتمسك الكتاب ,وطبعا جيبك هينقح عليك ,تقوم جايب القلم البينك الجديد وتقعد تعلم على الحاجات المهمه عشان لما تاجي تراجع ,وفي هذه المرحله صدقني لما اقولك ان المقعده معدتش مريحه خالص , وان انت طول النهارنايم على ضهرك على الكنبه اللي في الصاله ,وابوك يعدي يشوفك يقول " ابقى قابلني لو فلحت " .

في هذه المرحله الحاسمه ,بتبدا تقرأ وخلاص ,ممكن تقرا وانت بتتفرج على المسلسل ,المهم ان ضميرك يبقى مستريح انك قلبت كل صفح الكتاب ,بتبدا تقرا العناوين بس ,تطنش التفاصيل لو عندك عنها اي فكره ,ولو معندك فكره هتقرا اول سطرين تدرك الموضوع ومش هتكمل ,وهنا تبدأ بقى مرحله السهر ,وتبقى صديق الشاي والقهوه ,تطبق بالتلات ايام ,انت بقى همك انك تعلم على كل صفحه من صفحات الكتاب بصباعك ,بس بعقلك هاهأ أو .

واغرب حاجه لما تخلص الكتاب ,انت مش عارف حاجه فيه , بس فرحان وفخور انك خلصت الماده , وتتصل بقي بكل صحابك تحكي معاهم , والسؤال اللي بينتشر بالفتره دي " ذاكرت ايه ؟؟ " ,والفيس هيتملى بوستات من هذه العينه " بذاكر ارجو عدم الازعاج " , "مغلق للانتحانات " ,ومن بره هلا هلا ومن جوه يعلم الله , وتشوف الواحد تلاقيه عنده رغبه جامحه عارمه في انه يشوف الفيس ,يقوم يفتح اللاب يتفرج على الفيس ,يلاقيه فاضي ومفهوش حاجه مفيده ,يقوم يستحي على دمه ,ويقولك انا هاقفل الجاهز خالص واذاكر ومش فاتح الجهاز قبل ما اخلص جدول النهاردا ,ومتنكرش انك هما عشر دقايق على ضهرك وتقول " يا لهوي دا انا نسيت اكتب كومنت للواد مسعد " او اي حجه من هذه العينه ,تدور على اي حاجه تافهه جدا تخليك تفتح الفيس ,تاقي نفسك مقتنع انك لو مفتحتش تعملها ,ممكن المريخ يخرج عن مساره ويدمر الارض , 10 دقايق كتاب ونصايه فيس وهلم جره .

وطبعا في الفتره دي معظمنا بينسى يعني ايه حلاق ,او في حالات اشد واخطر بيروح يشدها بالموس زلبطه ,قال ايه عشان يقعد يذاكر ويركز وييسيبه من شعره ,او عشان ميخرجش من البيت خالص ,ويقعد على الكتاب يجيب الامتياز ,و والاسبوع الاخير دا دقنك بتبقى ربت عناكب ,ولو هزيتها كدا ممكن تطلع منها سندوتشات كنت مخزنها للطوارئ ونسيتها .

ويا جدع الاكل لا يحلو الا في الشهر ما قبل الامتحانات , كمية الاكل بتتضاعف ,والاكل اصلا بيوفرلك حجه مناسبه عشان تقوم من على الكتاب وتقول لنفسك كلام من عينة " نسبه الجلكوز في الدم قليله والمخ مش عارف يتغذى هاذاكر ازاي ؟؟ !! " بروح اهلك دي اللي ثبتت في دماغك من كل الكتب دي ؟؟ ,المهم صفحتين وسندوتش , صفحتين وجوافايه , قايم تجيب قلم " ما دمت قمت اقوم اعملي حته سندوتش بيض صغنن " ,رايح تصلي تاخد سندوتش راجع من الصلاه تاخد سندوتش ,ومين مننا مزيتش الكتاب وهو بياكل سندوتش البيض بالسمن البلدي او طعميه العربي يوم السوق ؟؟.

والمسلسل بيبقى في قمة الاثاره وقت الامتحانات ,عفاف هتسيب مرعي ولا لا ,وهل متولي هيقتل عوضين ؟؟؟ ,وسبحان الله متفوتش حلقه واحده في المسلسل ,وتحفظه كويس جدا , ورغم انه مسلسل من 1000 حلقه وشغال من اول السنه الا انك مادركتش اد ايه هو مسلسل رائع الا دلوقتي يا حدق .

وطبعا مش هتكلم على علاقتك بربنا اللي بتبقى افضل ما يكون , الفجر فجر مش صبح ,والنوافل والسنن ,ولا باس بقراه القليل من القراان ليلا , دا انا بقولكش وحش , بس انا بقولك متخلكش واطي ,زي ما انت محتاج ربنا في زنقتك ,اشكره في رخاءك يا جدع استحى

انا كتبت الكلام دا ليه ؟؟ ,لاننا بنعمل الكلام دا بدون وعي مننا ,انا غرضي اني اكشفك قدام نفسك , وانت لسه قدامك فتره وعندك امل قبل الامتحان , الفتره دي مناسبه ولسه بدري بس الفكره ازاي نستغلها , القرارات السليمه تاتي من الحكمه والحكمه تاتي من الكثير من القرارات الخاطئه ,انت بقاله 15 سنه بتغلط نفس غلطاتك , ربما جه الوقت اننا نلعبها صح ,طول عمرنا بنندم على اليوم اللي ضيعناه قب الامتحان بيوم , بنقول " لو بس الامتحان كان بعد بكره " ,اهو الامتحان لسه بعد بعد شهر , متضيعش يوم ,متضيعش نفسك .

عايز تعمل جدول اعمل , بس تبقى ناوي تلتزم بيه ,وتلتزم بيه ,متاخدش راحتك طالما معملتش اللي عليك , متنامش غير وانت مخلص يومك كامل , لو يم خرب بقيت الشهر هيخرب ,ملهاش لازمه حاجات زي الالوان , والتسطير والروقان دا ,دا بتاع اول السنه وانت ضيعت اول السنه متضيعش بقية السنه ,الذكي هو اللي لما يتحط في ظرف ياقلم نفسه على الظرف دا .

اياك تقول لنفسك مش هالحق , اياك تقول لنفسك مش هاقدر ,اياك تفكر في انك مش هتفتكر او هتنسى في الامتحان , عقلك الباطن بيصدق الكلام دا, املاه بافكار جيده , قول لنفسك " انا هاقدر التزم , انا هاقدر انجح ,انا هاجيب امتياز " هيصدقك صدقني , وهيتعامل من منطلق كلماتك , احنا بننسى في اللجنه لاننا واحنا داخلينا بنقول " احا لو بعد كل المذاكره دي نسيت ؟؟ " , تفاءلوا بالخير تجدوه .

متنساش تاخد وقت لنفسك ,كل ساعتين خد نص ساعه راحه تشحن نفسك ,متقسوش على نفسك ,عشان متهكعش في الاخر ,مش الفكره انك اول ما تبدا تخلص بالاربعين صفحه وتاجي في الاخر مش قادر تكمل صفحتين ,دا احسن ولا انك تمشي بمعدل 15 من اول يوم للاخر يوم ,وعن تجربه شخصيه اهم حاجه انك تراجع المنهج كله مره قرايه سريعه مش شرط تفهم المهم تقاره سريعا قبل الامتحان بيومين , وتنام بدري عشان تصحى بدري ومتتقلش في الفطار يا عم كل بعد ما ترجع ,,,,,,,بالتوفيق لنا جميعا ......لا تنسونا من صالح دعاؤكم

الاثنين، 2 مايو، 2011

مامااااااااااااا فين الفول ؟؟!!

عارف اعلان انا كدا انا اسبرايت ؟؟ ,اهو انا كدا انا فول ,يا سيدي بعرفش ابدا يومي غير بلواية الفول "لوايه اي ساندوتش اي شطيره " ,ومش اي فول ,لازم فول امي ,اللي بتعمله بايدها ربنا يخلهالنا ,وتهرسه وتحط عليه فلفل حامي ,وزيت زيتون ,وشويه طماطم ,وتعالى يا حماده يا حبيبي كل عشان تروح الكليه .

تسمع عن ال "الفيزيكال ديبيندانس " ؟؟ ,اهو انا كدا بالنسبه للفول , لو ماكلتش فول كمياء ( كمية ) المخ عندي تتلخبط ,وتفكيري يتنيل , وردود افعالي تبقى عجيبه ,دا افعالي ذات نفسها بيبقى ملهاش تفسير .

المهم في يوم حصل ,اللي الواحد كان خايف منه , امي مجابتش فول ,مفيش فول على الصبح ,مش هاخد جرعتي ,بتقولي وبكل بساطه كدا ,كل جبنه ,كل بيض ,قال يعني الجبنه والبيض هيعملوا حاجه ,واحد بيشرب حشيش ,ينفع تعوضه بسجاره كيلوباترا ؟؟ ,مكنش اتعذر ولا باع جذر .

وطبعا لاني عيل مؤدب ,وشطور وبسمع الكلام ,اكلت جبنه ,عشان لو كنت اكلت بيض كان عبحي رد عليا وقالي " بيض يا بيض " ,المهم ,وزي ما توقعنا كمية مخي اتلخبطت وبقيت شخص تاني ,شخص غريب عجيب ,ممكن نقول اني بقيت مجنون .

اول ما دخلت اغسل وشي ,حطيت شويه الميه في ايدي , وهوبا طسيت وشي ,هتقولي طبيعي , هاقولك اتقل عليا ,اللي مش طبيعي بقى ,اني رفعت وشي وهو مبلول ,قدام المرايه ,استنى لما نقطة ميه تتجمع على طرف منخيري ,واقوم نافخ ,تقوم طاااااااااااااااااايره وعلى المرايا ,متسالنيش بعمل ايه ,بقولك مجنوووووووون ,لا والادهى اني مستكفتش ,دا انا قمت نافخ 3 نفخات ب 3 نقط , وسبتهم يتسابقوا , وانا بعلق على السباق المثير ,وامي بره بتنده " انت بتكلم نفسك يا حبيب ماما ؟؟ " .

المهم بعد ما السباق خلص ,طلعت من الحمام على قوضتي , فتحت الشباك اتفرج شويه على الشمس ,وهي بتطلع حبه حبه ,فتحت اللاب ,فتحت الفيس ,وطبعا كالعاده النت زباله , قلت البس عبال ما الفيس يفتح ,وقلت وانا بلبس اشغل اغنيتين جايز يعدلوا مزاجي ,اسمحلي افكرك , انا دماغي فيها عنصر كميائي مهم جدا ناقص ,يعني ما انا على وشك انه اعمله انا غير مسؤوول عنه امام القضاء سواء مدني او عسكري ,حضرتك قاعد بدور على حاجه البسها ,واذا بنصي التحتاني يخرج عن السيطره ,ويتمايل ,ااه يتمايل , واذا بس احط القميص على كتفي ,وانا واقف بالفانيله ,وعشان الرقابه بنطلوووووون كروهات ,وامسك الفرشه ,واغني ,ااه بغني ,انا بقولكش ان صوتي حلو ,بس هي طلبت معايا اغني ,لا واتفرج على نفسي في المرايه وانا بغني , بقولك معنديش فوليك اسيد ,دماغي مش شغاله ,كل دا وامي بتنده " انت يا زفت اخوك في ثانوية ونايم " وعبدالباسط بيصرخ "انا انا انا موش عارفني " .

طبعا تحت ضغوط خارجيه ,قررت اني ابطل والبس هدومي بقى , عشان خاطر عيون اخويا اللي في ثانويه ,المهم انا بحب الكروهات جداا ,دا ملوش علاقه بالفول , ولا اقولك ليه علاقه بعيده ,هتقولي ازاي ؟؟ ,الموضوع وما فيه ان الكروهات بتداري الكرش ,ااه عندي كرش صغنن ,وفي طريقه الى الزوال ان شاء الله ,المهم لفعت القميص الكاروهات الاخضر ,والبنطال الكحلى ونزلت للموقف ,وامي بتنده " حرك نفسك شويه وبطل تكاتك بقيت زي الكرنبه " .

وطبعا سمعت كلام ماما ,وركبت التكتك لحد الموقف ,انا بحب اركب في الميكروباص في الكرسي الوراني على اللمين ,ليييييييييه ؟؟ ,عشان اولا ملمش الاجره وقد اشرت الى هذه المعضله في نوت سابقه ,وكمان عشان ابقى مستريح ,شباكي جنبي ,عايز افتحه افتحه ,عايز اقفله اقفل امه ,وانا بموت في اني اطلع ايدي من الشباك ,استمتع بالهوا ,اهبل بقى ,ونصيحتي ليك متركبش في موقعي دا لو العربيه 2009 فما فوق ,مش هتلاقي شباك ,وهتقعد قدامك واحده بنت ,وتضطر تقفل الشباك ,عشان الطرحه متتطايرش , وانت تتسلق ورا ,لدرجه انك تحاول تسيطر على عقلها بالتخاطر عشان تفتح الشباك ,وفي الاخر تموت فطسان ,ودي قصه حقيقيه ,كل دا وانا بنده للسواق " الدوران معاك يا اسطى " .

انا بنزل الدوران , ولو في حاجه اتعلمتها انا واصدقائي من الدوران ,انك لو في اتوبيس اركبه , ولو اضطريت اسفا انك تركب تاكسي ,اليك نصيحه اخويه ,عشان متتثبتش ,وتنضرب على قفاك , تقعد تحرق في دمك شهر بحاله ,لحد ما يجيلك قرحه وتموت وكل دا عشان جنيه ,لما تركب التاكسي ,متدلوش فلوسه غير لما توصل ,لان سعادتك لو معجبتوش الاجره ,وطلب زياده , وانت طلبت معاك متدلوش زياده هيوقفك بعيد عن مشوارك ويضربك وياخد منك اللي هو عايزه ,وبذلك تبقى اتضربت على قفاك وكمان موصتش لحد مستشفى الجامعه ,اما بقى لو ضربك قدام مستشفى الجامعه اهو على الاقل وصلت يا جدع ,والنصيحه التانيه , انت اعمل حسابك وكون فااكك ,تنزل من العربيه ,تمد ايدك من الشباك , ايدك بس يا بابا , تحطله الاتنين جنيه , وتجري على المستشفى تتحامى في الحرس لو ثولت له نفسه الدنيئه بالشر , كل دا والسواق بينده "فاضل جنيه يا دكتور ,فاضل جنيه يا ابن التيييييييت " .

وصلت المستشفى معزز مكرم ,واللي يعرف مجموعه بي انف واذن يعرف انا بتكلم على ايه ,الدور الخامس يا ولاد التيييييييت ,هي ناقصه ,دا انا بوصل الراوند فوق موحوح ,هافهم ايه بعد رحلة ابن بطوطه دي ؟؟؟ ,بس طبعا لاني النهاردا مش عاقل ,فانا فوجئت ان ممكن في الطريق الى راوند الانف والاذن ممكن تسلي نفسك خالص لحد ما توصل ,تبدا التسلية بالشاشه السامسونج ال 32 بوصه اللي في مدخل المستشفى ,مين منا ما جاش في باله انه يسرقها ,انا فكرت وخططت ,الموضوع بسيط ,انا واتنين صحابي هناجر عربيه بس يكون مرسوم عليها سامسونج ,او نرسم احنا يا سيدي , وناجي نقولهم اننا قسم الصيانه جاي يتاكد من فاعليه المنتج ,وهوب نشيل الشاشه ,هوب نحطها في العربيه ,هوب نرجع العربيه ,وهوب نخبيها في شقة عبحي ,ونبقى نوصل وصله عشان دوري الابطال .

بعد ما تعدي الشاشه ,عندك الممر ,اهو دا احلى ما في الراوند ,بص لو المراوح مقفوله ,افتحها ,طول ما انت ماشي شد الحبل النازل , وشغل الشفاطات كمان ايه المانع ,بقولك ماكلتش فوووووووووووول ,اهو انا بقى لقيتها مفتوحه ,تخيل اعمل ايه ؟؟ ,معرفش ليه بس تخيلت اني طياره شراعيه , والمراوح بتزقني لمين وشمال ,متخيل دكتور محترم ماشي يتنطوح لمين وشمال ؟؟ لحد ما توصل ,كل دا والعامل اللي ورايا بيقول في سره , "ربنا يهدي ويشفي كل مريض " .

تطلع السلم يا حدق ,وتترزع في الراوند ,طبعا صحتك خلصانه ,لما احنا الدكاتره بنموت عبال لما نوصل للدور الخامس ,عايز افهم ازاي ,عيان المفروض عنده مشكله في منخيره انه يوصل سليم ؟؟ ,كل دا والدكتور بيقول " الدكتور ابو كروهات سرحان في ايه يا شاطر ؟ "

انا طفل وهافضل طول عمري طفل , وانا عندي سبعين سنه برضه طفل .

انا مجنون ,وهافضل طول عمري مجنون ,و حتى لو بقيت اكبر دكتور هافضل برضو مجنون .

الدنيا حلوه ومجنونه والوانها بمبي ,احنا اللي لابسين نضاره سوده ,احنا اللي بنجري ورا الكاابه والحزن , وسايبين السعاده والفرح , اتعودنا على الهم والغم لحد ما الهم ركبنا ودلدل رجليه .

ليه بنقتل الجنون اللي جوانا ؟؟ , ليه حابسين الطفل اللي جوانا لحد ما هيتخنق ويموت ؟؟ .

ليه لسه بندور على السعاده رغم اننا ممكن نصنعها بادينا ؟؟ .

الدنيا خرباااااااانه يا عم خربانه متاخدهاش جد ,استمتع ,انت هتعيش مره واحده بس .

بطل اكل فول وخليك سعيد ,بطل اكل فول وخليك مجنون .

بطل اكل فول وعيش بقى .....................................................تمت