ماما طابخه كوسه

ملحوظه :-

1- ابويا مهندس

2- مهندس في السعوديه

3- امي مهندسه

4- خالتي مهندسه

5- شايل بايو في سنه تانيه

6- شايل ميكرو في سنه تالته

انا هنا بدافع عن تسريب الامتحنات , ااه بدافع , ووالله صعبان عليا الناس اللي بيتسربلها الامتحان دي , دول غلااااابه ,ومساكين , وطافحين الكوسه زيهم زينا ,بس هما عشان متداريين وبيشتكوش ,احنا مفكرين ان حياتهم سهله , وايزي ومعاهم الامتحان واشطه جدااا , عشان كدا انا قلت ادافع عن الناس الغلابه المهضوم حقهم دول .

اولا ان الامتحان يتسرب مش جديده ,دا الثانويه العامه اللي هي الثانويه العامه بتتسرب , ودي الثانويه اللي بتحدد هندخل طب ولا لا , هتاجي على امتحان ماده في طب ااخرته ايه يعني ؟؟ ,عيان يموت ؟؟ ,واحد يتشل ؟؟ ,يا عم دي كلها امور بسيطه وملحوقه ان شاء الله , وكمان ما احنا كتير فيها ايه لما اموت واحد ولا اتنين عشان مش عارف ؟؟ , واهو المره الجايه اتعلم .

ثانيا احنا كطلبه بتدخل الامتحان مذاكره كل حاجه , وطالع دين اهلها في السهر والتعب , وفينا اللي بيقعد بالاسبوعين ميستحماش , منعرفش كم الضغط الرهيب العجيب الفظيع اللي بيتعرضله الناس الغلابه اللي بيتسربله الامتحنات ,عشان كدا مش مقدرين انهم بيتعبوا زيهم زينا , ومفكرين انهم بياكلوها بالساهل , دا احنا ظلمه يا جدع .

تخيل معايا كدا لو حصل , بقولك لو ,و مرتبش على الكليه ,ويعيني عليه جاب امتياز بس يدخل على الوالد

"بابا "

" نعم يا حماده "

" النتيجه ظهرت "

" ها يا حبيبي طلعت الكام ؟؟ "

" لا يا بابا انا جبت امتياز بس "

يتغير لو وجه الاب , وتتغير اللهجه ولو مجلوش ذبحه

" نعم يا روح امك ؟؟ , امتياز بس ؟ "

" ايوه حضرتك "

" انت ياد انت ,مش اونكل مرعي جايبلك الامتحان قبلها بيومين "

" ايوه يا بابا ,بس انا اتلخبطت "

" قلب امك , اتلخبطت يا بيضه , لا دا انا قسيت عليك قوي ,انا اسف يا دكتور , يعني غيرك بيذاكر كتب 500 صفحه , وانت بتذاكر 10 اسئله , وتقولي اتلخبطت"

" بس يا بابا .............. "

" بس في عينك , اطلع بره , دتك البلاويه وانت غبي كدا , خساره فيك الاكل والله "

ويفضل دم الاب يغلي ويغلي لحد ما يموت ,ويفضل متعككن , وزعلان ومضايق ,لاحظ كل دا والابن جايب امتياز , وناجي احنا نقول حياتهم سهله , ومش مضغوطين زي ما احنا مضغوطين ,دا احنا ظلمه والله ,طب تصدق بالله دا احنا في جنه بالمقارنه معاهم والله تخيل معايا كدا انت ضارب الجيد بس , وداخل على ابوك بكل عنطزه ,وتكبر , ورافع منخيرك في السما ,ابويك يسالك

" مالك يا ولد نافخ نفسك كدا ليه "

" ولد ؟؟!! , انا دكتور يا حج , عموما هاسامحك , النتيجه ظهرت وجبت جيد الحمد لله "

تنفرج اسارير الاب ,ويفرح ان ابنه عدى السنه نظيف ,لا وكمان جاب جيد طب والله جيد , وقلبه في صدره يرقص من الفرح بس يقولك برخامه

" ومجبتش جيد جدا ليه ؟؟ "

" يا عم احمد ربك , دا الامتحنات كانت نفخ "

وطبعا الاامتحان كان عادي جدا بس انت اللي بتستعبط طول السنه ,ومقضيها , بس ابوك مش عارف بقى , وانت الدكتور وفاهم انت بتقول ايه

" عموما مبروك يا حماده , وان شاء الله السنه الجايه احسن "

" ان شاء الله يا حج , بس انت ادعيلنا "

" ربنا يوفقك "

وتفضل انت واقف , وبتتمرج لقدام وورا قدام ابوك , ما انت جايب جيد بقى , ومجهود السنه كله باء بالنجاح وربنا سترها معاك , فابوك ببصلك كدا

" عايز ايه يا بني , وسع خلينا نتفرج على الماتش "

" كل سنه وانت طيب يا حج "

" وانت طيب يا سيدي , بمناسبه ايه ؟؟ "

" لا ابدا السنه خلصت سعادتك , وشطبنا خلاص ,والحمد لله الشغل مية فل وعشره "

" اااااااااااااااااااه , حاضر يا سيدي هاديك عنيا بس وسع من قدام التلفزيون "

" ربنا يخليلنا عنيك يا حج , هات انت بس ميايه من تحت الحساب ونبقى نكمل بعد الماتش "

طبعا واحد جايب جيد , ابويه مش هيرفضله حاجه , يطلع المحفظه , وينكتك ميايه من غير مناحيه

عرفتوا اننا لما ميتسربلناش الامتحان اننا في نعمه , وان الناس اللي عارفه الامتحان دول غلابه ومساكين , وربنا يقويهم على ما ابتلاهم ؟؟

في الختام "ان الله لا يضيع اجرا من احسن عملا "

"من غشنا فليس منا .......تمت

استرجل وادخل طب

هو في حد في الدنيا عاجبه حاله ؟

,هو يعني انت لو طيار ,ومقضيها كل يوم في بلد ,ومتجوز عارضه ازياء فرنسيه هتبقى حالك عاجبك ؟؟؟

,ولو مثلا انك امين عام الامم المتحده هيبقى حالك عاجبك ؟؟؟

. انت لو مليردير هتبقى راضي عن حالك ؟؟؟

صديقي العزيز ,حالك مش هيرضيك ولو كان مصباح علاء الدين في يديك .

هو دا الطبيعي ,الطبيعي انك تعترض , الطبيعي انك تتشكى ,الطبيعي ان حظك زفت , الطبيعي ان في مؤامره ضدك ,الطبيعي ان النظام هو اللي غلط .

,

مش طبيعي انك تقتنع بان حالك هو الاحسن ,مش طبيعي انك تقول انا ابن محظوظه ,مش طبيعي ان الظروف ماشيه بيك لهدف معين ,مش طبيعي ان الغلط فيك مش في النظام .

صديقي ,الكبير عايز يصغر , الصغير عايز يكبر ,التخين عايز يخس ,الرفيع عايز يتخن ,الوحشه عايزه تحلو والحلوه عايزه توحش ,لا وسعت مني دي ,انت فاهم قصدي صح ؟؟ .

بص حوليك ,بص كويس ,قولي انهوا كليه احسن من كليتنا ,صيدله ؟؟؟ ,اسنان ؟؟؟ ,هندسه ؟؟؟ ,تجاره انجليزي ؟؟؟ سياسه واقتصاد ؟؟؟

الكلام الاتي مش هجوم على اي كلية ولكن كل كليه ليها صعوباتها و احنا بنختار نبص على المميزات بس

صيدله ,مع احترامي لكل الصيدليه , لو منتش عبقري في الكميا ,يعني يا حبيبي البايو كمستري دا يبقى تسليك سنان بالنسبه ليك ,هيبقى مفيش فرق بينك وبين البقال اللي على ااخر شارعكم .

اسنان ,عارف في طب ,لو ليك واحد صاحبك ما شاء الله عبقري وتقيل في الصنعه ,عارف تعمل ايه ؟؟,اعرف هيختار تخصص ايه , وسيب التخصص دا ,خلينا ناكل عيش , انما في اسنان , لو معاك واحد احسن منك هتروح فين يا حبة عيني ؟؟؟ هتاكل زلط , اقولك افتح سيبر .

,هندسه ,انت واحد كان عقدتك في تانيه البايو , وشابتر الفيزيكال بتاع الفسيولوجي , تخيل بقى ان دول كل حياتك ؟؟؟

تجارة انجليزي ,ما هو متفهمنيش انك هتتخرج من هنا والبنوك تتخانق عليك ,والمؤسسات المصرفيه تعلن انسحابها من سوق البورصه ,والبورصه تنهار لو ابو عبرازق مجاش يشتغل عندنا ,طالما مش متميز ااخرك قهوجي ,دا لو معاك على الاقل سنتين خبره .

,سياسه واقتصاد ,انت سعادتك فاهم ان مثلا دوله هتغزونا عشان عايزه سعادتك سفير عندها , ويا سلام بقى لو كنت حاجه في البلد الايام دي ,خد بقى ما تتمنى من انواع السباب وقلة القيمه , دا عصام شرف اتشتم هتاجي عليك انت ؟؟

انا هنا مش هاقولك على نظرة الناس ودعواتهم لما تخفف عنهم الالم

,او فرحة العيله وانت طالع بتقولهم العمليه نجحت و دا احنا فرحنا بفرحه نجاح ناس منعرفهاش اصلا ومعملنلهومش حاجه عشان جابو مجميع حلوه في الثانويه ,شوف جو النتيجه على الجروب كان عامل ازاي , مبالك لما تكون انت سبب الفرحه دي ,

انا هاكلمك عن الفلوس , اه الفلووووس الدولرز يعني ,بص خلينا واقعيين , المتميز بيكسب في اي حته حتى لو بيشتغل في الزباله ,عارف لو انت دكتور متميز ممكن تقبض كام ؟؟؟؟ ,انا فاكر الدكتور في الرمد وهو بيقول عمليه - بارس بلانا فيتركتومي - بتكلف حوالي مليون جنيه ,فاكر كويس صدى المليون جنيه هو بيتردد في دماغي جنيه ينطح جنيه ,جندي ينطح جندي ,لحد ما ضيع مني المحاضره , عملية الزايده , اللي هي انا لو ركزت شويه ممكن اعملها بمطوه وفوطه ,عملية الزايده دي بتاخدش ربع ساعه ب 600 جنيه دا عند اي دكتور مكحكح بقولكش تميز هنا , قولي شغلانه تانيه بتعمله 600 في اسهل ربع ساعه ,وفي غير كدا كتير كفايه انك تبص لعمليات التجميل اللي عمليات تكميليه بتعمل قد ايه , ربنا يزيد ويبارك الهم لا حسد . .

انا هاكلمك على البرستيج ,متضحكش على نفسك , وتقولي ان كلمة دكتور ملهاش قيمه , يا جدع دا انا لما عم محمد دهب (صاحب قهوة دهب ) بيقولنا اتفضلوا يا دكاتره ,القهوه كامله بتسعنيش , ولما يسالنا المعتاد يا دكاتره ؟ ,اااااااااه على الجمال ,روح لاي مدرس ,وادخل سلم عليه ,شوف هيسلم عليك ازاي وهو بيقولك ازيك يا دكتور ,حتى لو بعدها قالك بتسالش ليه يا جزمه ,بس لكلمة دكتور رجه جميله في القلب ,و هيبة في اذن السامع ,عارف اكبر دليل على مكانة كلمة دكتور ايه ؟؟؟ ,انك ممكن تقول لسواق التوكتوك ,عندالاستاد يا هندسه ,او لبتاع الطعميه ب 2 جنيه طعميه يا استاذ ,بس عمرنا ما سمعنا واحد بيقول لسواق الميكروباص , الدوران يا دكتره ؟؟؟ مع الاحترام للمهندزين والاساتذه . .

انا هاكلمك عن الاثاره ,انت واحد جرئ ,وعايز تشتغل عالم ومستكشف , عايز تطلع الفضاء ,بتسال نفسك كل يوم قبل ما تنام ,انا ايه اللي دخلني الكليه دي بدل ما اروح اتسلق قمة ايفريست ؟؟ ,معندناش مانع ,كله قدامك على التربيزه ,تخيل معايا وانت ماسك المشرط ,تخيل معايا وانت بتفتح العيان ,تخيل الدم , لو دا مش ادرنالين هيبقى ايه الادرنالين ؟؟ ,انا سمعت مره جراح بيقول الجراحه دي اجمد من المخدرات ,تخيل كدا ان غلطتك بمليون غلطه , تخيل انك فتحت وريد غلط , الدم هوب انفجر وغرق وشك ,والالات بدات تزمر معلنه عن قرب الاجل , تخيل لما تاخد نفس وتكتمه ,وتمسك مقصين في جفتين ,وفجأه الراجل يعود للحياة ,عايز حاجه تضاهي شعورك في اللحظه دي ؟؟؟ .

هاكلمك عن الالغاز والغموض ,تخيل ان جالك عيان , يقولك يا دكتور انا لفيت على دكاتره العالم ,محدش فيهم عارف انا عندي ايه ؟؟ تخيل كمية التفكير , دا انت بترتحش الا لما تحل فزوره حد قالهالك وهي ملهاش لازمه ,تخيل بقى لما يبقى ليها لازمه ,عايزك تتخيل شعورك لما تكتشف الحل ؟؟؟,عايزك تتخيل لما تقوم تقف قدام المرايا الصبح وانت بتظبط القميص عشان رايح تقول لمريضك انا اذكى من كل البهايم اللي انت رحتلهم قبلي ,علاجك اهو على الجزمه – بهزر طبعا - .

هاكلمك عن البنات يا سيدي ,تخيل معايا حادثه بشعه على الطريق , وسوسو مغمن عليها في العربية المرسيدس , يعيني حكت في الرصيف اتخضت من الصوت , وصحباتها واقفين حوليها مرعوبين , سوسو مش بترد يا ابو سوسو , تنزل انت من العربيه الفيات 128 وبكل تناكه , وسعي كدا يا انسه منك ليها , وتعمل شويه شعوزه , سوسو تفوق ,وصحبات سوسو في صوت واحد "انت دكتور فظيع " وتتجوز سوسو وتبقى توصلك بالعربيه يا سيدي عن ما حد حوش

يا جدع دا انت لو ليك في الكاابه ,وبتحب الجو الاسود دا, اكيد في مسيرتك هتموتلك عيانين تلاته , ابقى فرغ عواطفك كلها وانت بتقول للعيله , الحاج اتوكل :( .

هاكلمك عن الغرور ومنخيرك اللي في السحاب ,لما تبقى ماشي في الشارع , وواحد يسلم عليك , ويقول لصاحبه بيعرفه انت مين ,دا الدكتور اللي انقذ حياتي , وانت تبتسم كدا بكل تناكه , وانت بروح اهلك عامله زايده ,ولما الام تبوسك عشان ابنها هيعيش وانت تقولها يا حاجه بالراحه ,دا وش مش طبق شوربه ,او لما تاجي تشرشح للمكوجي , وتقوله انا دكتور يا حيوان ,

متحاولش تقولي ان طب وحش , طب اروع كلية في الدنيا , بس احنا اللي دايما لابسين نظاره سوده دايما , مش فيما يخص الكليه بس, انا عايز اخس وانت عايز تتخن وهو عايز قفاه يعرض حته ,محدش عاجبه حاله

,بس دا مش ذنب الناس اللي لسه مجربتش ومستامناك على نصيحه

,

عايز تقول لاخوك لاختك لابن عمك ان طب زباله , قوله يا عم ,قوله ان المناهج صعبه لان لازم يعرف كل حاجه لان الغلطه بحياة بني اادم ليه اب وام , ليه اخ واخت ,ليه ابن , ليه صحاب

عايز تقوله انت هتتعب وهتتخرج حمار ,قوله يا عم ,بس قله برضو ان الله لا يضيع اجر من احسن عملا .

عايز تقوله هتقبض1100 قوله بس متنساش تقوله ان الفلوس بتاجي وتروح انما دعوة الناس بتتعوضش ,ودمعة ام انت عالجت ابنها لاتقدر بثمن

عايز تقوله مش هتجوز ,قوله , بس متنساش تقوله ان الجواز قسمه ونصيب ,وانك متعرفش انت ممكن تطب وتحب فين ؟ ,وجايز بين جدران المشرحه مين عارف؟؟ .

قول اللي انت عايز تقوله بس يا ريت تقول الحقيقه كامله ,

في الختام اسالك سؤال مش عايز اجابته , جاوبه مع نفسك , لو رجع بيك الزمن ورا , هتختار تدخل كلية ايه ؟؟؟؟؟؟؟

اهداء الى اخي محمد عبدالرازق

80 مليون مبارك

احمد طالب الثانويه العامة

النهاردا امتحان الجبر ,

قاعه الامتحان ,

قبل نهاية الوقت بنص ساعه ,

احمد يلتفت لزميله مرعي ,

احمد هامسا : المسأله الاخيره دي قانونها ايه ؟؟

مرعي : طرفين في وسطين

احمد يحل المسأله , ويجيب درجه عاليه في الجبر

احمد رئيس الجمهورية

النهاردا انتخابات الرئاسه ,

لجان الفرز ,

هاتف القاضي مرعي يرن ( اكيد مش نفس مرعي الاولاني )

احمد اامرا : ازيك يا مرعي ,معاك رئيس الجمهوريه

مرعي : اهلا يا ريس ازي الصحه ؟؟

احمد : الحمد لله كويسه , ايه الاخبار عندك ؟؟ مش محتاج اوصيك طبعا

مرعي : عيب يا باشا , دا احنا لحم اكتافنا من خيرك

احمد رئيس جمهوريه لفتره خامسه

محمد موظف في شركه حكوميه

محمد قاعد على المكتب ,

قدام المكتب كرسي بيقعد عليه العميل , وبره طابور طويل من العملاء مستنين دورهم ,

العميل : عايزين نخلص المصلحه دي يا محمد بيه وحياة ابوك

محمد : اكيد يا باشا بس انت عارف الحاله وحشه الايام دي

العميل : انا عارف

ويمد العميل ايده اللمين في جيبه ,يطلع اللي فيه النصيب , يسلم على محمد بيه ,يختفي اللي فيه النصيب

محمد يرفع السماعه ويطلب رقم

محمد : ايوه يا مرعي بيه ,, ازي سعادتك ,, والله انا كنت عايز خدمه كدا ,,الله يخليك

بعد يومين

ذات العميل : انا قلت اتصل اشكرك بنفسي يا محمد بيه ,شغل على مياه بيضا ربنا يكرمك

محمد : احنا في الخدمه يا سعادة البيه ,لو احتجت ايوها حاجه احنا موجودين بس متنسناش من حلوة المولد بس

محمد رئيس الجمهوريه

في غرفه الاجتماعات ,

محمد يجالس سفير دوله اجنبيه ,

السفير : يا سعادة الريس احنا عايزين ناخد الارض بتاعت توشكى بسعر كويس

محمد : يا عمونا دي اراضي الدوله والفلوس دي بتاعت الشعب مينفعش اقلل في سعرها

السفير : ما احنا هنعوض الفرق لسعادتك يا ريس

محمد : مش فاهم

السفير : احنا هندفع جنيه للمتر ,ومقابل كل متر هنشتري اسهم في شركه سعادتك اللي في سويسرا

محمد :اذا كان كدا ماشي

يرفع سماعة الهاتف

محمد : اديني وزير الزراعة ,, ايوه يا مرعي ( برضه مش مرعي الاولاني ) ,, خلص يا عمونا لحبايبنا في توشكا واكرمهم .

سعيد كاتب صحفي شاب

سعيد يجلس على القهوه مع احد اصدقاءه ,بيشربوا شيشه ويلعبوا ضومنه

سعيد : عارف ياد يا مرعي انا شفت ايه امبارح ؟؟

مرعي : ايه كفى الله الشر ؟؟

سعيد : شفت المدير بتاعنا بياخد رشوه عشان يداري على خبر تبع الناس الكبيره .

مرعي : وانت عملت ايه ؟

سعيد : ولا حاجه عملت نفسي مش شايف, وانا مالي يا عم انا عايز ااكل عيش

مرعي : ومبلغتش عنه الكبار ليه

سعيد : يا عم وانا مالي ؟؟

سعيد رئيس الجمهوريه

يجلس في مكتبه , يتصفح الورق , يرن الهاتف

سعيد : ايوه يا مرعي

مرعي ( وزير الخارجيه ) : ايوه يا ريس , المخابرات بتقول ان امريكا باعته سلاح لاسرائيل يضربوا بيه الفلسطينيين

سعيد : لا حول ولا قوة الا بالله , طيب ولا كاننا عرفنا حاجه خلينا في مصالحنا , الوطن محتاج الهدوء الفتره الجايه

المعلم متولي تاجر مواد غذائيه بالجمله

يجلس في دكانه الضخم ,قدامه اوراق وكشوفات , ويتجمهر حول المكتب مجموعه من المعلمين الكبار

المعلم غضاضه : ايه يا معلم متولي ؟ انت ماسك علينا السكر والدقيق ليه بس ؟؟

المعلم متولي : انا ممسكتش حاجه يا معلمين , السوق شاحح على الاخر وزيي زيكم

المعلم سباعي : يا معلم متولي صبياني حالفين بالطلاق ان عربيات السكر جايه مفرغه حموله كبيره امبارح بليل

المعلم متولي : بصوا يا معلمين , انا الكميه اللي عندي قليله , وسعرها كدا اللي عاجبه يشتري واللي مش عاجبه يفتح الله

المعلم زناته : طب هز السعر شويه يا معلم , وحياة الولاد

المعلم متولي : ولا مليم

يرتفع الصوت ويعلوا الهرج والمرج ,وينصرف المعلمين منهم الغاضب والمتحسبن , ومنهم اللاعن ,منهم من اشترى مجبرا ومنهم من استعوض على الله

يدخل المعلم مرعي على المعلم متولي

المعلم مرعي : سلام عليكم يا معلم متولي

المعلم متولي : وعليكم السلاااااام ورحمه الله وبركاته ,اتفضل يا معلم مرعي

المعلم مرعي : اخبار السكر والدقيق ايه يا معلم ؟؟

المعلم متولي : كله موجود وتحت امرك يا ابو نسب

المعلم مرعي : لسه يا معلم , انا مفاتحتش البنت

المعلم متولي : وهي هتقول لابوها لأ برضو يا معلم , وكمان هو انا فيا عيب ولا فيا عيب ؟؟

المعلم مرعي : اعوذ بالله يا معلم متولي دا انت سيدي الناس بس ..

المعلم متولي : لا بس ولا حاجه , واد يا فجله ,حمل عربيتين للمعلم مرعي دقيق وسكر من اللي في المخازن السريه

المعلم متولي : ودا مهر الاموره , انت الوحيد اللي عندك البضاعه دي يعني انت اللي بتحكم في السعر

الريس متولي رئيس الجمهوريه

الريس متولي جالسا في ديوان الرئاسه , يدخل عليه السكرتير

السكرتير : ضيف لسيادتك يا ريس

الريس متولي : مين ؟؟

السكترتير : عز مرعي رجل الاعمال

الريس : خليه يتفضل

يدخل شاب قصير القامه مهندم الملبس , تبدو من هياته الثقه الزائده

عز مرعي : ازي معاليك يا سياده الريس

الريس متولي : ازيك يا عز ؟؟ وازي ابوك ؟؟

عز مرعي : الحمد لله بيسلم على سعادتك

الريس متولي : وازي اختك هانم ؟؟

عز : الحمد لله يا ريس

الريس متولي : ارجو انك تكون جايبلي اخبار كويسه

عز : اكيد يا ريس بس في موضوع كدا عايز اكلمك فيه الاول

الريس : خير يا ابو نسب ؟؟

عز مبتسما : عايزك تمشيلي موضوع حديد الدخيله

الريس : مش لما تمشيلي موضوع هانم ؟؟

عز : واهو مشى

الريس : ولتكن عز الدخيله يا سيدي

الاستاذ شحاته دكتور في جامعه كليه الحقوق

يجلس الاستاذ في منزله مرتديا الجلباب ,يتحدث مع ابنه طالب في كليه الحقوق

شحاته : بص يا حبيبي انا كلمتلك اونكل مرعي عشان امتحان الشفوي بتاع بكره , تدخل تقوله بابي بيسلم عليك

جيمي : حاضر يا دادي

شحاته : وشد حيلك , الناس بتاكل وشي عشان قاعد بزوقك وعايز اعينك في الجامعه وانت فاشل

جيمي : حاضر يا دادي

شحاته متمتما : هو انا عملت ايه يا ربي عشان ترزقني بعيل غبي زي دا

وتمضي الايام ,ويتعين جيمي معيدا في الكليه بالرغم من من يسبقه في الدفعه في التقدير .

شحاته رئيس الجمهوريه

شحاته يجلس في المكتب ,يدخل ابنه جمال

جمال : ازيك يا بابا

شحاته : قلتلك ستين مره هنا تقولي سيادة الريس مش بابا , احنا في المكتب مش في بيت اهلك

جمال مرتبكا : انا اسف نسيت

شحاته :انا مش عارف انت هتخلفني في الرئاسه ازاي وانت بالغباء كدا , الله يكون في عون الشعب من بعدي

جمال منكسا راسه

شحاته يرفع الهاتف : اديني مرعي ,, ايه يا مرعي ؟؟ ,,ايه الاخبار ؟؟ ,, طب كويس انا عايز الواد يبقى رئيس من غير مشاكل يا مرعي ,,وعايزها تبان بيضه ومزاططه يا مرعي ,, طيب يلا شوف شغلك

الدكتور عادل طبيب جراح

غرفه الاستقبال في عيادته مليانه مرضى , كل واحد مستني دوره عند الدكتور المشهور ,

يدخل المريض الاول , يجد الدكتور وتلميذه مرعي بالداخل ( مرعي جاي بيدرب عند اونكل عادل )

المريض : يا دكتور انا عيان قوي

دكتور عادل : ولا يهمك يا حج انا هاكتبلك روشته متخورش الميه

المريض : ربنا يكرمك يا دكتور

مرعي : بس مش هاتكشف عليه الاول ؟؟؟

دكتور عادل : انت هتفهم اكتر مني يا مرعي ؟؟ انت هتعرفني شغلي ولا ايه ؟؟

المريض : متاخدش على كلامه يا داكتور لسه صغير ربنا يوفقه

يكتب الدكتور عادل روشته سمينه , ويسلمها للمريض

المريض : كل دا يا دكتور ؟؟ هو انا عندي ايه ؟؟ سرطان كفى الله الشر ؟؟

الدكتور : بلاش غلبه يا حاج يلا عشان اللي بعده

مرعي : هو انت اديتله ايه يا اونكل ؟؟

الدكتور : شويه مضادات على مسكنات على كدا

مرعي : بس انت متعرفش هو عنده ايه ؟

الدكتور : مش مهم , اهي بتصيب اكتر ما بتخيب وعشان متضيعش وقتك وتكسب اكتر وانت عارف ان مرضانا يااكلوا الزلط

مرعي : اها فهمت

دكتور عادل رئيس الجمهوريه

يجلس في مكتبه , يدخل السكرتير

السكرتيتر : مرعي بيه وزير الصحه يا ريس

الريس : خليه يتفضل

يدخل مرعي يسلم على الريس , يلتفت ليتاكد ان السكرتير مشي , ويقترب من الريس هامسا

مرعي : السويد عارضه علينا شويه ادويه قربت صلاحيتها تنتهي يا ريس وبسعر خرافي

الريس : قدامها قد ايه وتفسد

مرعي : قول شهر ولا حاجه

الريس : اشتري يا مرعي , اهي مره تخيب وعشره تصيب وانت عارف ان شعبنا يااكل الزلط وادينا نوفرلنا قرشين نديهم لوزاره الشباب والرياضه

عبدالمنعم مشجع متعصب

يجلس عبدالمنعم امام المباراه , بيااكل السجاير مش بيشربها , متوتر جداا ,فريقه متااخر بهدف

منال : عبدالمنعم

عبدالمنعم دون ان يلتفت حتى : نعم ؟

منال : مش هتصلح الغساله ؟؟

عبدالمنعم : وانتي شيفاني فاضي يا منال دلوقتي ؟؟

منال : طيب مرعي ابنك المدير طرده من المدرسه ومديله استدعاء ولي امر

عبدالمنعم : حاضر هابقى اروح

منال : وعايزه فلوس عشان السوق

عبدالمنعم يقفذ من الكرسي : جووووووووووووووووووووووووووووون

منال : الفلوس يا عبدالمنعم

عبدالمنعم : حاضر لما تفرج وقومي يلا اعمليلي شاي

يخسر فريق عبدالمنعم المباراه , ويقم مغموما يهيم على وجهه في القهوه , ويرجع نص الليل , لا الغساله اتصلحت ولا هو فاكر مين مرعي ولا معاه فلوس لانه خسره في الرهان على فريقه

عبدالمنعم رئيس الجمهوريه

يجلس العربه في طريقه الى الاستاد ,المنتخب هيلعب النهارده في النهائي

عبدالمنعم يرفع هاتفه النقال في اللحظه اللي لسه هيتصل بالمدير الفني عشان التشكيله يدق التلفون

عبدالمنعم : ايوه

صوت صارخ من بعيد : العباره غرقت يا ريس

عبدالمنعم : عباره ايه ؟؟

نفس الصوت : العباره اللي جايه من السعوديه يا ريس

عبدالمنعم : طيب اتصرف انت وانا هاكلمك لما افضى

لحظه اغلق الهاتف جلس يفكر مع نفسه واذا بيه يقول في كل اسى وحزن

اااااااااااه لو كان عماد متعب موجود , مكنش الواحد اعصابه اتشدت كدا

لو امعنا النظر , فنحن نسخ مصغره ممن نكره .

لو امعنا النظر ,لادركنا اننا نحاول ان نمحو ذلك الذي يذكرنا بمن نحن حقا .

لو امعنا النظر , لشابت رؤوسنا ,فنحن شياطين ترتدي لباس الملائكه .

لو امعنا النظر ,لوجدنا ان من نعيب ,ما هي الا ظلالنا .

لو امعنا النظر ,لوجدنا ان هناك 80 مليون استدعاء لمحكمه الضمائر لم توزع بعد

لو امعنا النظر ,لايقنا انه لا يغير الله ما في قوم حتى يغيروا ما في انفسهم

لو امعنا النظر , فالفساد ظهر في البر والبحر بما كسبت ايدي الناس

لو امعنا النظر , لوجدنا مبارك عقاب لنا من الله على ما ارتكبنا