دول طيبين اوي يا خال

لو قلتلك ان انا ماسك في ايدي حاجه سمره ,و بزراير ,وليها شاشه ,وقلتلك ايه اللي انا ماسكه هتقولي ايه ؟؟

هتقول موبايل ,هاقولك لا دا االه حاسبه ,هتقول االه حاسبه هاقولك لع دا ريموت التكيف بتاعنا ,يبقى انت نظرتك وتخيلك للاشياء بيختلف عني وعن مسعد وعن ابراهيم ,يا ترى دا ذنبي انا ؟ ,ذنب مسعد ؟ ,ذنب اللاله الحاسبه ؟ ولا ذنبك انت ؟؟؟

عزيزي المواطن ,صوابعك مش زي بعضها ,وصاوبعي مش زي صوابع امك ,يبقى لما تسلفني الشراب بتاعك وميجيش على مقاسي ,متقولش ان صوابعي صغننه انت اللي صوابعك حوافر .

اسهل حاجه عندنا اننا نطلع العيب في اللي حوالينا ,في الظروف ,في القدر , في الحظ ,انما اننا نفكر ان ربما , جايز ,لعل ,ماي بي العيب في حضراتنا لاااااااااااااااا .

في الفتره الاخيره لاحظت تبرم وتذمر زملاؤنا طلاب طب على حياتنا ,اشي اللي يطالب ان بنات طب تبقى احلى ,واللي بيطالب ان ولاد طب يبقوا اشيك ,واللي بيعقد المقارنات بينا وبين طلاب الكليات التانيه ,المهم ان الاخوه والاخوات طلعوا ان العيب على الكليه في الاخر ,وان الواحد لما بيدخل كليه طب ,بيكبوا على وشه مية نار ,وبيقطعولوا هدومه ,وبيسحبوا من اخواتنا الميك ااب ,وبياخدوا علينا تعهدات اننا منتمتعش ولا نعيش حياتنا ولا نشوف فرح ابداااااااا والا هيحرمونا من مكافئة الثانويه العامه .

وبما اني طالب طب ,فمن حقي اني ادافع عن الكليه وعن نفسي ,انا من وجهة نظري ان العيب مش في الكليه ,العيب في الناس اللي في الكليه , مش الكليه اللي حولتك الى ظل انسان ,الى شخص تعيس ,كئيب ,متخلف اجتماعيا ,انت اللي كدا من يومك ,افتكر كدا ايام الثانويه ,هتلاقي نفسك نفس الكئيب الممل اللي هو انت الان ,يبقى متقولش ان طب كئيبه واداب حلوه ,قول انا كئيب وهافضل طول عمري كئيب ولو دخلت كليه اقتصاد منزلي حتى هاقعد اذاكر مادة التريكو ولما اخلص هاراجع على مقادير الطبيخ ,ممكن تقولي ما انا لو معملش كدا هاسقط ,وانا ممكن اقولك حمرا .

من و احنا صغننين وهما مفهمنا ان المذاكره عكس اللعب , وانا شايف ان دا غلط ,انت عند 24 ساعه في اليوم ,30 يوم في الشهر 9 شهور دراسه ,متفهمنيش انك متعرفش تقسمهم بين دراستك ولهوك ؟ ,الفكره في طالب طب انه بيذاكر 12 ساعه وال 12 الباقيين بيفكر في مذاكره بكره ,قلقان على الامتحان بتاع امبارح ,خايف زميله يبقى ذاكر اكتر منه ,خايف ينسى الانسرشن بتاع الباي سيبس ,طالب الطب بيضيع وقته ,ااه بيضيع وقته ,يعني بدل ما تطلع من الامتحان تسال عن اجابه السؤال كذا ,وتطلع غلطان ,وتكتئيب وتروح مغموم ,وتروح تنام وتضيع اليوم اللي كنت ناوي تااخده اجازه ,وترجع تقول طب خلاني كئيب ,اطلع من الامتحان ومتسالش ,لسبب بسيط اللي اتهبب اتهبب ,يعني لو غلطت هتدخل تصلحها ؟؟ ,اطلع ابدا يوم اجازتك على طول متضيعش وقتك ,و مش معنى انك بتلعب انك بتخيب او انك واخده من وقت مذاكرتك ما هو متفهمنيش انك 24 ساعه على الكتاب ؟ ,انا بقولكش متذاكرش انا بقولك لما تخلص استغل الوقت دا صح , زي ما بتخطط للمذاكره خطط للعب ,المشكله فيك مش في طب ,كل الكليات بتمتحن ,كل الكليات بتذاكر ,كل المذاكره بتخلص سواء طب او اداب ,الفكره انت بتعمل ايه بعد ما تخلص ؟؟؟؟

هاحكيلكم عن ناس انا اعرفها في كليات طب ,انا مش هتكلم عن المذاكره ,انا هتكلم على ما بعد المذاكره ,واحد راح عمل سكاي دايفنج يعني نط بالبراشوت ,واحد ساق طياره ,و حضر حفله لارمين وتياستو دول مشهورين بس انت متعرفهمش ,واحد زار ستامفورد بريدج دا ملعب تشيلسي , واحد قفل ما يقارب 200 لعبه ,واحد احترف جميع العاب القهاوي ,طاوله ودوميونز وشطرنج ,واحد مسبش مسلسل الا ما شافه , واحد قرا اكتر من 200 كتاب , واحد سافر امريكا , وغيرهم وغيرهم من اللي عملوا حاجات انت بس بتحلم بيها ومفكرها محرمه على امثالنا ,انما العيب مش في الحاجات دي لان لو واحد في طب عملها يبقى العيب مش في طب العيب فيك .

وموضوع البنات اللي مش عاجبينك ,ما هو لو مش عجبينك يا حبي يبقى متريلش عليهم ,ولا هو فقر وعنطزه ,في اي مكان في الدنيا ,في طب في اداب وحتى في الازهر في بنت حلوه وبنت وحشه ,ملهاش علاقه بالكليه , في بنت بتحط ميكاج وواحده لا ,في بنت بتحط ميكاج صح وبنت بتحط ميكاج غلط بنت بتحب كدا واخرى بتحب كدا ,دي ازواق واراء ,واللي مش عاجبك بيعجب غيرك ,انت مش من حلاوتك قوي يعني عشان تحكم ,واراهن ان اللي عامل جروب زي دا واحد معرفش بنت ولا كلم بنت في طب قبل كدا,ولا حتى شاف بنت في اداب قبل كدا ,خلينا نبص لحالنا ونسيب الناس في حالها ,و بلاش تعيب على الحاجه اللي انت مش عارف توصلها .

في الختام ,يا ريت نبطل موضوع التعميم ,متعممش اللي بيحصلك على الباقي ,ركز في نفس وشوف العيب في مين ,هتلاقيه فيك انت لوحدك ,وابدا صلح في نفسك ,طب مش ضلمه زي ما احنا بنقول ,احنا اللي عقولا ضلمه ,ما تحملش غيرك مسؤوليه الملل اللي انت عايش فيه ,يومي 24 ساعه يومك 24 ساعه يوم طالب اداب 24 ساعه ,الفكره في اللي بتعمله في ال 24 ساعه

الدكتور زفت

اول امبارح في الميكروباص ,راكب واحد من طريقته وكلامه فهو من الطبقه المتوسطه تعليميا ممكن تقول انه صنايعي ,المهم الاخ بيتكلم في التلفون صراحه انا معرفش ايه الموضوع ومكنتش مركز معاه لحد ما قام بصوت عالي قال " حاضر هاروح للدكتور زفت لما اوصل " .

عشان تنتج لازم تعيش ما انت لو مين مش هتعمل حاجه ,وعشان تعيش لازم تحب ,تحب اللي بتعمله وتحب اللي بتعمل له ,بس في الوقت الراهن انا شايف ان صعب جدا اني احب حد او حاجه ,انا مش بتكلم هنا عن الحب العاطفي الرومانسي انا هنا بتكلم عن الحب النفسي ,الحب للبلد الحب لزمايلك الحب للمكان والزمان .

المكان والزمان دول ملناش ايد فيهم ,ودول عناصر ممكن تستخدمها في الشر زي ما ممكن تستخدمها في الخير فانا بحب المكان والزمان ,بس بكره و بشده كمان الاشخاص اللي ملو المكان ,وقضوا على الزمان .

بكره الجهل اللي للركب ,من ابسط الى اعلى فرد ,ومش هاقولك اني كدكتور مش جاهل ,لا دا انا جاهل واخطر جاهل ,كام واحد فينا بيذاكر ويقرا الكتب وهو في عقله ان دا للامتحان ؟ ,ويركز على النقطه دي عشان بتاجي في الامتحانات ,ويهمل دي عشان مش من الاسئله المشهوره ,ما هو دا مش علم دا جهل ,كام واحد فينا اهتم انه يقرا كتاب خارجي في مجال الطب ؟ ,كام واحد فينا فكر ينمي مرهبه عنده انه يقرا عنها ؟ ,كام واحد فينا عمل للبحث كوبي وباست من غير حتى ما يتعب نفسه انه يقراه ويشوف مكتوب فيه ايه ؟ ,ما هو دا مش علم ,ولومش علم هيبقى ايه غير جهل ؟ ,تحس اننا في حاجه جوانا ضد العلم ,بنكرهه لله في لله , من ساعت ما وعينا على المدارس واحنا بنطفش ,لو سالتك ايه اللي فاكره من المدرسه ؟ ,هتقولي ارتفاع السور 3 متر ,بعرض 50 سم ,وعليه ازاز متكسر من اول البوابه لحد العامود والباقي بلانك , وانسب نقطه للهروب هي النقطه ب المماسه للشعاع المار بالعامود اللي في الملعب ,انما انك تفتكر استاذ او كتاب انسى الا من رحم ربي ,متحاولش تغلطني وتفتكر مدرس العربي ,انت عارف انا قصدي ايه ؟ ,من صغرنا واحنا اتعودنا اننا نحفظ ونصم لحد ما دماغنا بقت مستقبل بس ,انما انها ترسل او تحلل او تخطط ,لا يا عم صداع ,بصراحه الواحد عايز يعمل مشروع العقل الاجنبي ,اصل انا جسد ميمشيش معاه العقل المصري لازمني واحد اجنبي يمشيني عشان ناخد بطولات ونجيب الدوري .

بكره المأوحه والمناحيه ,بكره الجدال لغرض الجدال ,انت ذات نفسك كام مره دخلت في نقاش تافه لغرض النقاش , وتقعد تناحي وتحرق في دم اهلك عشان يبقى اسمك اقنعته ,وجايز انت اصلا مش مقتنع ,دا انت لقطت فكره وجبت عكسها وبقيت الرسول بتاع الفكره العكسيه دي ,الواحد بقى مفكر ان لازم يبقى في جدال عشان يبقى في رأي ,رغم ان المفروض العكس ,الرأي اولا والجدال ثانيا ,دا لو اختلفنا في الرأي ,ومش معنى ااننا دخلنا في جدال ان لازم واحد يطلع صح وواحد يطلع غلط ,عمرك سمعت عن مصطلح مناظره ؟ ,المناظره ما هي الا جدال ,الجدال غرضه توضيح الرأي ,وتوصيل معلومه ,مش غرضه انك تقنع الطرف الاخر ,غرضه انك تعرض مش تعارض .

بكره عدم احترام الاخر ,اسهل ما عليا اني اسبك واطلع تييييييييييت امك ,بس اصعب ما عليا اني ابص للموضوع من وجهه نظرك ,انت لو مختلف معايا تبقى ابن تيييييييت ومبتفهمش وعميل ومضحوك عليك ومش عايز استقرار وكل اللي يحبه قلبك ,عارف ليه ؟ لان دا احلى ,احنا نحب الولعه والنار والملايات المفروده والردح ,هو الردح موجود غير عندنا ؟ ,الكلام سهل والشغل صعب , يبقى انا اسهل عليا من اني اتفق معاك ونبدا نشتغل ونعمر اني اعترض واوقف العجله ونقعد انا وانت نتناقش هو جلبيه حذيفه قطن مصري طويل التيله ولا قصير التيله ؟ ,ويا جدع نادرا ما تشوف واحد بيسمع التاني بيقول ايه اصلا ولا بيفكر في كلامه ,الناس بتتكلم وتسكت عشان تسمع الرد ,انما احنا بنتكلم و ونريح عشان نكمل كلام ,ولو سمعت الكلام بتسمعه مش عشان انك تفكر فيه ,لاااااااااااااا دا عشان تلاقي غلطه تمسك في زماره رقابتها وتنهي الحوار منتصر ,رغم ان المفروض في الحوار مفيش فائز وخاسر ,الحوار في رأي وأخر بس .

بكره كتر الكلام وقله العمل ,تلاقي الواحد من دول نازل كلام ,ومناقشات ,وعرض وتحليل ,والبلد عشان تتصلح اعمل كذا وكذا ,والتعليم مش هيرقى غير لما تعمل كذا وكذا ,لسانه ما شاء الله بيسر حكم ,تاجي تقوله طيب اعمل ,يقولك اصل وكاني وماني ,احنا بتوع كلام بس ,عارف اللي بشتغلوا فينا فين ؟ ,بره في الخليج ولا اوروبا ,نموت احنا في الكلام ,انما الشغل يااااااااي عرق ,بيتكلم عن تغيير العالم ,وهو حتى ما اخدش خطوه عشان يغير نفسه .

بكره الكسل في التفكر ,كل واحد ربنا رازقه بحاجه اسمها عقل ,بس يبدو اننا كسلنا زي ما بنكسل في حاجات كتير اننا نقرا الكتالوج ,وعشان كدا مش بنستخدمه وبنقول اهو اللي تهضمه المعده يتاكل ,الواحد ممنا قليلا ما يفكر في الحاجه قبل ما يعملها ,والادهى انك لو شفتها من حد غيرك هتسبه هو واهله ,ياشيخ تبص تلاقي الواحد من دول بيشرب العصير وهو على جنب الشارع ,ما هو دا اكيد مفكرش وما مستعملش عقله وقال ان الزباله لو ملت الشوارع مش هنعرف نعيش ,واني مش هاتشل لو شلت العلبه معايا 2 متر لحد ما الاقي صندوق ارميها فيه ,والمشكله انه يزعل قوي لو لقى كلب ولا مؤاخذه عاملها قدام عتبه بيتهم ,رغم انها نفس الفكره انت سبت قاذوراتك في الشارع اللي هو بيت الكلب ,والكلب ساب قاذوراته قدام بيت حضرتك .

العب معايا لعبه صغيره ,لو انت اول شخص طلع بلوتو ,هتقول ايه ؟؟؟ ................................ قارن بين اللي قلته واللي قاله ارم سترونج لما طلع القمر "انها خطوة صغيره لرجل وخطره كبيره للانسانيه " ,انا بقولكش اطلع القمر ,انا بقولك فكر في غيرك ,كبر دماغك ,مش بمعنى نفض يا عمي , بمعني بص للصوره الاكبر ليه يكون في كسبان واحد ,ليه منكسبش كلنا ,ليه دايما تفكيرنا اننا نعمل مجد شخصي ونحقق حاجه لو ركزت فيها تلاقيها فرديه ,ليه بيبقى جوانا شعور بالغيره , ليه بنتمنى الفشل والشر لغيرنا ,ويا شيخ الواحد مننا بدل ما يقعد يفكر في تحسين ذاته بيفكر اذاي ممكن اني اخسر الاخر ,انا مش عايز ابقى احسن واحد لا انا عايز الكل يبقى اوحش مني وخلاص ,وعشان كدا بكره الانانيه

قلبي كره العادات ,كره الافكار ,كره الاشخاص وكرهت المكان والزمان ,ولو جتلي نص فرصه عشان امشي هامشي لان في بلدي قلبي توقف عن الحب جايز يعرف يدق في حته تانيه بعيد عن السواد دا ,بعيد عن المكان اللي صفوته ممثلين ومغنين ولعيبه كوره وجماهير بتلبس جلبيات ,هامشي من المكان اللي فيه بتاع الطعميه بيتقاله باتنين جنيه يا استاذ وانا يتقالي يا زفت ,هابعد عن المكان اللي خنقني وخنق افكاري ,وشوه عقلي ,اللي بقى على موجة استقبال بس ,ماركة صم وانسى ,هاسيب المكان الللي بيتحكم في مصيري فيه غيري ,هاسيب المكان اللي الناس فيه بتكره النظافه والنظام ,وخايفه ان عيوب الناس تروح لانهم مش هيلاقوا حاجه يعملوها ويضطروا يشتغلوا ,هاسيب المكان اللي انا تعلمت فيه انه القانون اتحط عشان اخرقه ,واني استعمل الحاجه في غير موضعها يعني اللبوس يتاخد .....عضل ,هاسيبها مخدره .

وفي الختام انا بكره الكره ,اللي تحس انه نار مولعه في قلبي ,بكره السواد اللي عنيا مش شايفه غيره ,بس الكره سهل والحب صعب ,وانك تلاحظ الوحش اسهل من انك تدور على الحلو ,انا عيل مش كويس وقلبي اسود و مريض نفسيا وبكره وبكره وبكره وعمري ما هاعرف حب ولا هاشوفه ولا هاورد على جنه ,انا عيل واطي وخاين وعميل ومستهلش ترابها ولا ميتها ولا دم الناس اللي راح عشاني ,,,, انا الدكتور زفت

صندوق لكل مواطن

الانسان عنده عدد اتنين عقل ,عقل واعي ,والعقل اللاواعي .

العقل الواعي دا اللي انت بتستعمله في الاستقبال ,الادراك ,التفكير ,التمييز ,واتخاذ القرار .

العقل اللاواعي دا ممكن نبسطه في انه مركز العادات ,يعني ايه مركز العادات ؟ ,يعني انت دلوقتي كل يوم متعود تصحى الصبح تغسل سنانك مثلا ,عمرك فكرت انت ليه بتغسل سنانك الصبح بالذات ؟ , ومتقوليش عشان النظافه والكلام الفاضي دا ,لانك لو نضيف بجد كنت غسلتها بعد كل وجبه ,يعني لو فكرنا بعقلنا الواعي ,يبقى المفروض نغسل بعد الوجبات كمان ,قلي كام واحد فينا بيغسل سنانه بعد الوجبات ؟ ,اقولك انا انت ليه بتغسل سنانك الصبح ,لانك خايف من السوسه الشريره تاكل سنانك وخايف من الملايكه تعمل حاجات وحشه في بقك ,هتقلي انت اهبل يا بني ؟ ,افهمك يا سيدي ,نرجع لاصل غسيل السنان وانت صغنن عندك سنتين وفرحان بسنانك ,الوالده جت قالتلك اغسل سنانك يا حماده عشان السوسه متاكلهاش ,والملايكه متبهدلكش ,قام عقلك الواعي الساذج ساعتها صدق وخاف من السوسه ,ومره مرتين عشرين غسلت سنانك عشان السوسه ,و مع التكرار بدات تبرمج في عقلك اللاواعي برنامج ,اللي هي انك لازم تغسل سنانك الصبح ,عقلك اللاواعي زي الكومبيوتر,مش هيقولك انت بتبرمجني بطيخ ليه ما الطماطم غاليه ,عقلك اللاواعي هيحتفظ بالبرنامج مهما كان ,وبعد كدا تنسى السبب ,وتستمر العاده ,صدقني لو فكرت في اي حاجه انت متعود عليها هتلاقي ليها اساس عدى على عقلك الواعي ,وهو سمح للفكره دي او البرنامج انه تنزرع في عقلك اللاواعي وينمو لتكون عاداتك

اعرف ان اي حاجه انت بتعملها واي عاده عندك انت مقتنع بيها او على الاقل كنت مقتنع بيها ,الا لو كان حد نومك مغناطيسيا وزرعها في عقلك اللاواعي بدون ارادتك ,المشكله اننا بنركز على العاده وننسى السبب اللي زرع فينا العاده دي .

طيب دلوقتي انا عندي عاده "برنامج في عقلي اللاواعي " اقدر اغيرها ؟ طبعا اقدر اغيرها واغير امها كمان ,بس الفكره ازاي ؟ ,بسيطه زي ما حطيت البرنامج الاول حط غيره ,يعني انت اعرف العاده "البرنامج " الخربان واعمل برنامج مكانه ,الاول استعمل عقلك الواعي ,وفكر قبل ما تعمل الحاجه الوحشه ,اللي هي طالعه من عقلك اللاواعي ,وقله لا يا حبيبي دا كان زمان دلوقتي انا اتغيرت ,ونفذ البرنامج الجديد اللي انت مظبطه ,هنا انت بتتعامل بعقلك الواعي ,بكره بعقلك الواعي ,بعده بعقلك الواعي ,بعد شهر بعقلك الللاواعي , وبكدا تكون اكتسبت عاده جديده ,منكرش انك تعبت في الاول في انك تجتز الشجره اللي كانت بذره وكبرت , اللي انت زارعها في عقلك اللاواعي من زمان ,بس مع الوقت البذره الجديده اللي انت زرعتها هتنموى وتعوضك عن شجره الشوك بشجره تفاح امريكاني ان شاء الله .

ورجاء يريت كلنا نبدأ بموضوع رمي الزباله في الشارع ,الزباله مش لازم تبقى كيس كبييييييييييير يشيله اربعه ,ما انت لو فتحت الكيس دا هتلاقيه مليان علب كنز صغيره ,متستهترش وترمي وتقول هي جت عليا ,ايوه جت عليك وعلى اللي خلفوك ,هو يعني ايدك هتتشل لو شلت علبه العصير ولا الورقه لحد اقرب صندوق زباله ؟ ,يعني هتموت يا اخي لو شلت مكانك بعد ما تاكل في الكليه ورميته في الصناديق اللي ملت الكليه ؟ ,لما تاجي ترمي في الشارع بعد كدا عايزك تفكر وتعرف اني في برنامج وساخه مزروع في عقلك اللاواعي ,وانك لازم تغيره وتنضف بقى ,لو مش عشانك عشانا احنا يا جدع ,انت وسخ دي مشكلتك ,متعيشنيش في مكان وسخ .

اللي دفعني لكتابه النوت دي ان في اخ مصري محترم كان في الكليه بياكل شبسي عادي زي اي مصري ,وبعدين رمى الكيس على الارض ,قام واحد ماليزي ماشي وراه شال الكيس ورماه في الزباله ,احكم انت مش حاكم انا .

لا يغير الله ما في قوم حتى يغيروا ما في انفسهم