الأربعاء، 13 أبريل، 2011

الدكتور زفت

اول امبارح في الميكروباص ,راكب واحد من طريقته وكلامه فهو من الطبقه المتوسطه تعليميا ممكن تقول انه صنايعي ,المهم الاخ بيتكلم في التلفون صراحه انا معرفش ايه الموضوع ومكنتش مركز معاه لحد ما قام بصوت عالي قال " حاضر هاروح للدكتور زفت لما اوصل " .

عشان تنتج لازم تعيش ما انت لو مين مش هتعمل حاجه ,وعشان تعيش لازم تحب ,تحب اللي بتعمله وتحب اللي بتعمل له ,بس في الوقت الراهن انا شايف ان صعب جدا اني احب حد او حاجه ,انا مش بتكلم هنا عن الحب العاطفي الرومانسي انا هنا بتكلم عن الحب النفسي ,الحب للبلد الحب لزمايلك الحب للمكان والزمان .

المكان والزمان دول ملناش ايد فيهم ,ودول عناصر ممكن تستخدمها في الشر زي ما ممكن تستخدمها في الخير فانا بحب المكان والزمان ,بس بكره و بشده كمان الاشخاص اللي ملو المكان ,وقضوا على الزمان .

بكره الجهل اللي للركب ,من ابسط الى اعلى فرد ,ومش هاقولك اني كدكتور مش جاهل ,لا دا انا جاهل واخطر جاهل ,كام واحد فينا بيذاكر ويقرا الكتب وهو في عقله ان دا للامتحان ؟ ,ويركز على النقطه دي عشان بتاجي في الامتحانات ,ويهمل دي عشان مش من الاسئله المشهوره ,ما هو دا مش علم دا جهل ,كام واحد فينا اهتم انه يقرا كتاب خارجي في مجال الطب ؟ ,كام واحد فينا فكر ينمي مرهبه عنده انه يقرا عنها ؟ ,كام واحد فينا عمل للبحث كوبي وباست من غير حتى ما يتعب نفسه انه يقراه ويشوف مكتوب فيه ايه ؟ ,ما هو دا مش علم ,ولومش علم هيبقى ايه غير جهل ؟ ,تحس اننا في حاجه جوانا ضد العلم ,بنكرهه لله في لله , من ساعت ما وعينا على المدارس واحنا بنطفش ,لو سالتك ايه اللي فاكره من المدرسه ؟ ,هتقولي ارتفاع السور 3 متر ,بعرض 50 سم ,وعليه ازاز متكسر من اول البوابه لحد العامود والباقي بلانك , وانسب نقطه للهروب هي النقطه ب المماسه للشعاع المار بالعامود اللي في الملعب ,انما انك تفتكر استاذ او كتاب انسى الا من رحم ربي ,متحاولش تغلطني وتفتكر مدرس العربي ,انت عارف انا قصدي ايه ؟ ,من صغرنا واحنا اتعودنا اننا نحفظ ونصم لحد ما دماغنا بقت مستقبل بس ,انما انها ترسل او تحلل او تخطط ,لا يا عم صداع ,بصراحه الواحد عايز يعمل مشروع العقل الاجنبي ,اصل انا جسد ميمشيش معاه العقل المصري لازمني واحد اجنبي يمشيني عشان ناخد بطولات ونجيب الدوري .

بكره المأوحه والمناحيه ,بكره الجدال لغرض الجدال ,انت ذات نفسك كام مره دخلت في نقاش تافه لغرض النقاش , وتقعد تناحي وتحرق في دم اهلك عشان يبقى اسمك اقنعته ,وجايز انت اصلا مش مقتنع ,دا انت لقطت فكره وجبت عكسها وبقيت الرسول بتاع الفكره العكسيه دي ,الواحد بقى مفكر ان لازم يبقى في جدال عشان يبقى في رأي ,رغم ان المفروض العكس ,الرأي اولا والجدال ثانيا ,دا لو اختلفنا في الرأي ,ومش معنى ااننا دخلنا في جدال ان لازم واحد يطلع صح وواحد يطلع غلط ,عمرك سمعت عن مصطلح مناظره ؟ ,المناظره ما هي الا جدال ,الجدال غرضه توضيح الرأي ,وتوصيل معلومه ,مش غرضه انك تقنع الطرف الاخر ,غرضه انك تعرض مش تعارض .

بكره عدم احترام الاخر ,اسهل ما عليا اني اسبك واطلع تييييييييييت امك ,بس اصعب ما عليا اني ابص للموضوع من وجهه نظرك ,انت لو مختلف معايا تبقى ابن تيييييييت ومبتفهمش وعميل ومضحوك عليك ومش عايز استقرار وكل اللي يحبه قلبك ,عارف ليه ؟ لان دا احلى ,احنا نحب الولعه والنار والملايات المفروده والردح ,هو الردح موجود غير عندنا ؟ ,الكلام سهل والشغل صعب , يبقى انا اسهل عليا من اني اتفق معاك ونبدا نشتغل ونعمر اني اعترض واوقف العجله ونقعد انا وانت نتناقش هو جلبيه حذيفه قطن مصري طويل التيله ولا قصير التيله ؟ ,ويا جدع نادرا ما تشوف واحد بيسمع التاني بيقول ايه اصلا ولا بيفكر في كلامه ,الناس بتتكلم وتسكت عشان تسمع الرد ,انما احنا بنتكلم و ونريح عشان نكمل كلام ,ولو سمعت الكلام بتسمعه مش عشان انك تفكر فيه ,لاااااااااااااا دا عشان تلاقي غلطه تمسك في زماره رقابتها وتنهي الحوار منتصر ,رغم ان المفروض في الحوار مفيش فائز وخاسر ,الحوار في رأي وأخر بس .

بكره كتر الكلام وقله العمل ,تلاقي الواحد من دول نازل كلام ,ومناقشات ,وعرض وتحليل ,والبلد عشان تتصلح اعمل كذا وكذا ,والتعليم مش هيرقى غير لما تعمل كذا وكذا ,لسانه ما شاء الله بيسر حكم ,تاجي تقوله طيب اعمل ,يقولك اصل وكاني وماني ,احنا بتوع كلام بس ,عارف اللي بشتغلوا فينا فين ؟ ,بره في الخليج ولا اوروبا ,نموت احنا في الكلام ,انما الشغل يااااااااي عرق ,بيتكلم عن تغيير العالم ,وهو حتى ما اخدش خطوه عشان يغير نفسه .

بكره الكسل في التفكر ,كل واحد ربنا رازقه بحاجه اسمها عقل ,بس يبدو اننا كسلنا زي ما بنكسل في حاجات كتير اننا نقرا الكتالوج ,وعشان كدا مش بنستخدمه وبنقول اهو اللي تهضمه المعده يتاكل ,الواحد ممنا قليلا ما يفكر في الحاجه قبل ما يعملها ,والادهى انك لو شفتها من حد غيرك هتسبه هو واهله ,ياشيخ تبص تلاقي الواحد من دول بيشرب العصير وهو على جنب الشارع ,ما هو دا اكيد مفكرش وما مستعملش عقله وقال ان الزباله لو ملت الشوارع مش هنعرف نعيش ,واني مش هاتشل لو شلت العلبه معايا 2 متر لحد ما الاقي صندوق ارميها فيه ,والمشكله انه يزعل قوي لو لقى كلب ولا مؤاخذه عاملها قدام عتبه بيتهم ,رغم انها نفس الفكره انت سبت قاذوراتك في الشارع اللي هو بيت الكلب ,والكلب ساب قاذوراته قدام بيت حضرتك .

العب معايا لعبه صغيره ,لو انت اول شخص طلع بلوتو ,هتقول ايه ؟؟؟ ................................ قارن بين اللي قلته واللي قاله ارم سترونج لما طلع القمر "انها خطوة صغيره لرجل وخطره كبيره للانسانيه " ,انا بقولكش اطلع القمر ,انا بقولك فكر في غيرك ,كبر دماغك ,مش بمعنى نفض يا عمي , بمعني بص للصوره الاكبر ليه يكون في كسبان واحد ,ليه منكسبش كلنا ,ليه دايما تفكيرنا اننا نعمل مجد شخصي ونحقق حاجه لو ركزت فيها تلاقيها فرديه ,ليه بيبقى جوانا شعور بالغيره , ليه بنتمنى الفشل والشر لغيرنا ,ويا شيخ الواحد مننا بدل ما يقعد يفكر في تحسين ذاته بيفكر اذاي ممكن اني اخسر الاخر ,انا مش عايز ابقى احسن واحد لا انا عايز الكل يبقى اوحش مني وخلاص ,وعشان كدا بكره الانانيه

قلبي كره العادات ,كره الافكار ,كره الاشخاص وكرهت المكان والزمان ,ولو جتلي نص فرصه عشان امشي هامشي لان في بلدي قلبي توقف عن الحب جايز يعرف يدق في حته تانيه بعيد عن السواد دا ,بعيد عن المكان اللي صفوته ممثلين ومغنين ولعيبه كوره وجماهير بتلبس جلبيات ,هامشي من المكان اللي فيه بتاع الطعميه بيتقاله باتنين جنيه يا استاذ وانا يتقالي يا زفت ,هابعد عن المكان اللي خنقني وخنق افكاري ,وشوه عقلي ,اللي بقى على موجة استقبال بس ,ماركة صم وانسى ,هاسيب المكان الللي بيتحكم في مصيري فيه غيري ,هاسيب المكان اللي الناس فيه بتكره النظافه والنظام ,وخايفه ان عيوب الناس تروح لانهم مش هيلاقوا حاجه يعملوها ويضطروا يشتغلوا ,هاسيب المكان اللي انا تعلمت فيه انه القانون اتحط عشان اخرقه ,واني استعمل الحاجه في غير موضعها يعني اللبوس يتاخد .....عضل ,هاسيبها مخدره .

وفي الختام انا بكره الكره ,اللي تحس انه نار مولعه في قلبي ,بكره السواد اللي عنيا مش شايفه غيره ,بس الكره سهل والحب صعب ,وانك تلاحظ الوحش اسهل من انك تدور على الحلو ,انا عيل مش كويس وقلبي اسود و مريض نفسيا وبكره وبكره وبكره وعمري ما هاعرف حب ولا هاشوفه ولا هاورد على جنه ,انا عيل واطي وخاين وعميل ومستهلش ترابها ولا ميتها ولا دم الناس اللي راح عشاني ,,,, انا الدكتور زفت

ليست هناك تعليقات:

إرسال تعليق